للا سف وداعا mybb

[safrot.com]

و الله الموضوع ده جيه في وقتو و دي فرصة كويسة جدا اني احكي فيها قصتي عن المنتدى و اعلق تعليق بسيط على كل الوضع الحالي :

انا كان عندي منتدى في بي و كانت الدنيا زي الفل استيلات مالية المواقع هاكات في كل حته كل الناس بتفهم في بي و كمان التعامل مهاع سهل و شكلو ظريف يعني كان تمام و بدا الرانك بتاع المنتدى يعلى و بدا يزيد عدد الاعضاء لكن حصل اللى ماكنتش عامل حسابه بعد فترة اتصلت بي شركة الاستضافة و قالولي انهم قفلو حسابي لاني مش معاي رخصة الفي بي قعدت ادور على الانترنت عن منتديات مجانية فلقيت ال phpbb and mysmartbb و طبعا mybb و بصراحة ماعرفتش اقارن بينهم مقارنة كاملة لاني كنت مستعجل اني ارجع المنتدى تاني علشان الاعضاء مايفقدوش ثقتهم في علما بان عدد اعضاء المنتدى كان معدي ال 100 بشوية و اللى خلاني اختار ماي بيبي هو منتدى الدعم ده لانو مركز في التلات اقسام دول و من الاخر هما المفيد كمان شكل المنتدى حلو يعني كان مبشر و بصيت على قسم الهاكات لقيت كل الهعاكات اللى انا محتاجها و قسم الاستيلات مالينا بردو المهم قررت اني احول ماي بي بي بصراحة في الاول عانيت كتير اولا انو مش بيكون جاهز على طول يعني عايز تركب المحرر المتطور للرد السريع و المحرر المتطور للتوقيع و كمان الاستيلات مش جامده قوي زي الفي بي و بصراحة مازالت عندي مشكلة مع الاستيل في الفايرفوكس كمان طبعا الرانك بتاع المنتدى قل بسبب الفترة اللى وقع فيها و عدد الاعذاء قل كمان و في اعضاء فقدو مشاركات كتير بسبب موضوع النقل ده لان كان عندي مشكلة في الداتا بيز لكن بردو بعضهم كان لسة متمسك بالمنتدى و كانو بيدوني النصايح و بيقوليلي احنا معاك و كمان كانو بيشوفو الحاجات اللى مش شغالة في المنتدى او اللى عايزة تعديل علشان احاول اصلحها و مع الوقت بدات بتعلم كل يوم و كل ما تقابلني مشكلة باكتبها هنا و الحمد لله دايما بالاقلها الحل و بدون مقابل الاخ بيبو مثلا خد مني بيانات الاف تي بي علشان يصلحلي المجلة و يشغلهالي الاخ توسكانا حط مرة استايل و كان فيه مشكلة قلتلو عليها راح مصلحها و اداني الاستايل لقيت مشكلة كمان عالجها و فضل معاي لما اشتغل الاستيل 10/10 الاخ عوض محمد و الموضوع الجميل اللى حاطو بيعمل للناس منتديات و بدون مقابل يعني بصراحة المنتدى زاخر بالاعضاء اللى الواحد يتشرف بمعرفتهم او انو يكون حتى موجود معاهم في منتدى واحد المهم ان مع الوقت الحمد لله تقريبا قربت اعالج كل المشكللات اللى في المنتدى و كمان شكلو بقى زي الفل و احسن بكتير من الاول و كل حاجة مجانية ايه اللى يودينا ناحية الفي بي ؟؟؟؟ و نتعرض لمشاكل و قصص اللهم اكفنى حلالك عن حرامك واغننى بفضلك عن من سواك .

اللى عايز اوصلو ان نسالة ال بي بي مسالة وقت و تعود و ان كل مشكلة ليها حل و خصوصا اذا كان في منتدى كامل للدعم زي اللى احنا فيه هنا و يا اخي الدنيا مش بتتاخد قفش واحدة واحدة والدنيا بتتظبط خلى عندك صبر و عزيمة و الدنيا هاتتظبط

حاسس اني طولت على الناس كلها

بس هما كلمتين كنت عايز اقولهم من زمان

لكم كل الشكر و التقدير و ارجو ان يوفقكم اللى الى ما تريدون و اترككم في رعاية الله

[Toscana]

احييك اخى safrot.com على كلامك الجميل وثقتك الغاليه فينا وبصراحة انت نبهتنى عن حاجة نسيت اقولها
ان احنا لو بصينا لنوع منتديات Vb انها فى البدايه خالص مكانش ليها هاكات كتيرة وكانت زى MyBB لسه فى البدايه حاجاتها قليله وهاكات قليله واستيلات
لو بصينا لتاريخ انشاء نوع منتديات Vb وقارناة بتاريخ انشاء وصدور نوع منتديات MyBB هنلاقى ان Vb تسبقها بكثير وفى مرة من المرات سمعت من اخى بيبو ان MyBB خلاصه من جميع انواع المنتديات وانا من اول يوم دخلت فيه المنتدى هنا وانا اعجبت باسلوبه وطريقه عمله
بصراحة مش لاقى اى فرق فى التقسيمة بتاعت المنتدى تختلف عن الــ Vb الا اشياء بسيطة جدا لاتكاد تذكر
وعشان كدة فضلت احاول ان اقدم شئ ولو بسيط جدا للمنتدى وطلبت نفس الطلب اللى طلبه الاخ نور نت وكان نفس رد بيبو عليا هو نفس ردة على نور نت انه مش سهل ويحتاج بمعرفه باكواد Xhtml ولغه البرمجة ولو بالقليل
على فكرة مفيش حاجة صعبه احنا اللى بنصعب الامور على نفسنا بس لو ركزنا شوية هنلاقى كل حاجة ادامنا سهله
لكن مشكلتنا اننا عايزين الحاجة جاهزة
السبب فى ان مفيش ستايلات كتيرة لان انا مش شايف اى اعضاء الا نادرا لما بيحطوا ستايل جدبد للدعم او هاك جديد
لكن لو بصينا لل Vb هنلاقى ان فى ناس كتيرة بتدعمها ستايلات وهاكات وناس متخصصه للبرمجة
ولو رجعنا تانى لــ MyBB مش هنلاقى الا بيبو جزاه الله خيرا ان هو اللى شغال لوحدة فيه ( بايديه وسنانه) وربنا يكون فى عونه لكن لو احنا اتكاتفنا وحاولنا نقدم حاجة مش ناخد بس من وجهه نظرى ان mybbهتفوق vb بمراحل
وبالله التوفيق

[safrot.com]

و الله يا جماعة الراجل ده بيقول كلام زي الفل

و الله انا نفسي ادعم المنتدى ده او اعمل اي حاجة اقدراساعد بيها بس انا للاسف خبرتي قليلة في المجال ده انا باتعلم منكم لكن انا ممكن افقيد المنتدى شوية في موضوع جوجل ادسنس او في حاجات تانية و انا ناوي في الاجازة ان شاء الله اخد كورس في ال css و ساعتها والله مش هاتاخر لو عرفت اي حاجة .

و بعدين انا عايز اقول حاجة مهمة تعليقا على كلام الاخ توسكانا انا شايف ان منتدى ماي بي بي قدام شوية هاياخد ترتيب وسط المنتديات الكبيرة و ابس مثال هو منتدى ip مش كان مجاني دلوقتي بقى ايه ؟ و الرخصة بتاعتو بكام ؟

من الاخر منتدى ما بي بي مش ضعيف لا ممتز و ان كان فيه بعض نقاط الضعف فدايماليها حل و بيتطور يوم بعد يوم

و اخ حاجة احنا فعلا محتاجين نتعلم و نعتمد على نفسنا و نبطل اسلو ان الواحد يكون معتمد على غيرو لازم نتعلم علشان نعرف نفيد نفسنا و نفيد غيرنا

تحياتي ليك اخ توسككانا و ربنا يكرمك

[Toscana]

ربنا يخليك ياباشا وشكرا على تعلقيك وانا ليه مش عارف ان فى ناس كتيرة بتدخل عالم MyBB ودايما يقارنوها بــ Vb
حاجة محيرة جدا

[عاشق العندليب]

أشكر الإخوة الأعزاء الذين وافقوني في رأيي و أحب أن أنوه لنقطة أخرى حدثت بيني و بين أخي بيبو ليعرف الناس جميعا هذا الشخص صاحب هذا المنتدى و ما يتمتع به من أخلاق حميدة.
عندما أنشأت المنتدى الخاص بي أخذت فترة حوالي ستة أشهر لكي أتعلم كيفية تركيبه و كم حذفت النسخة بعد تركيبها و كنت أسأل باستمرار و كان يرد عليّ دوما و في بعض الأحيان كنت أجد المساعدة من آخرين إذا وجدوا معرفتهم باستفساري.
بعد نجاحي أخيرا و الحمد لله كان يتطلب تصميم راية banner ليكون واجهة للمنتدى و معبرة عنه فطلبت منه أن يصمم لي بمقابل هذه المرة أو يرشح لي أحدا فأخبرني أنه لا يفقه في التصميم و رشح لي آخر.
بعد أن دفعت ثمن التصميم و استلمته وجدت مشكلة فيه لم يستطع المصمم إصلاحها فسألت أخي بيبو فأخبرني أنه سيحاول ذلك و أخذ يمارس مجهودات حتى أصلح لي المشكلة فعلا و كان من المفترض أن أقوم بدفع مبلغ له نظير هذا لكني نظرا لصعوبة ذلك عليّ هذه الفترة فقد عرضت عليه أن أضع منتداه على المساحة التي أمتلكها و هي كبيرة و الحمد لله إلا أنه رفض ذلك تماما لأنه يشك أن ذلك سيسبب لي ضررا بالغا و حتى الآن لم يأخذ مني بيبو نظير ما قدمه لي سواء أكان من تعلمي منه كيفية إنشاء المنتدى أم نظير إصلاحه التصميم لي.
لن أزيد عن ذلك و احكموا أنتم أنفسكم على ما فعله بيبو و تصفحوا أقسام المنتدى و شاهدوا هذا الدعم الذي لا يقدر بثمن و هو بالمجان تماما.
فجازا الله بيبو عن ذلك خيرا و جعله في ميزان حسناته.

[liro]

مكانش نفسى ارد فى الموضوع دا لانى محبش المواضيع بتاعة الوداع اللى العضو بيكون كاتبها عشان الناس تقعد تقوله عيد نظر احنا هنعمل اللى تطلبه او يكون الغرض انه يثير عصبية حد وكل ما حد يرد عليه يقوم يقابل مشاركاته باستهزاء كان مفيش زيه

لكن بسبب ردودكم قلت ارد انا كمان (يعنى هتذكروا محاسن الماى بى بى والدعم واقعد ساكت .. لايمكن)

عندك منتدى فى بى كل اللى بتعمله تحط هاكات واستايلات وتستنى الشركة تقفله ليك لانك مش مرخص او تدفع 160 دولار عشان ترخصه

عندك منتدى ماى بى بى هتحس انه صعب وغريب فى الاول وواحدة واحدة تتعود عليه وتعرف خفاياه
حاجة وقفت قدامك تسال الدعم والدعم عمره ما اتاخر فى الرد على حد سواء بالمواضيع او بالرسائل ولو هنتكلم عن خلق بيبو ومساعدته عاوزيين موضوع لوحده

انا بدات فى منتديات ماى بى بى بعد التحويل من الفى بى عشان الترخيص
كانت البداية 2008-02-26
بعت رسالة لبيبو من غير ما اكون كاتب مشاركة واحدة فى المنتدى
قلته عاوز احول منتداى ايه المطلوب وكان لسا موضوع التحويل مش زى دلوقتى
قعد معايا وساعدنى وادانى هاك تحويل الترميز ونجحت فى تحويل المنتدى وبعد كدا ربنا كان يعينه كل يوم كان لازم اساله عن حاجة سواء بموضوع او رسالة خاصة وكان على طول بيرد (هذا الموضوع مستمر حتى الان ..ربنا يعينه)
والحمد لله واحدة واحدة بدات اتعرف على هذا النظام الرائع

تعالوا الان انظروا الى منتداى ستجدوا انه لا يوجد اى فرق بينه وبين الفى بى بل ربما يكون افضل منه
كان الموضوع تحدى لى بان اجعل المنتدى يبدو كمنتداى الفى بى القديم والحمد لله وفقنى الله فى ذلك

انا تعلمت بنفسى تصميم استايل وفشلت اكتر من مرة لدرجة ان استايلى خد منى شهريين على ما طلع بالشكل اللى هو عليه دلوقتى
عاوز تعمل استايل خاص بيك اعرف دورس تصميم المواقع بالفرونت بيج والدريم ويفر لان محدش يقدر يشرح الكلام دا لانه كبير ومتشعب وكل واحد لازم يفهمه بطريقته

بالنسبة للعضو نور نت كاتب الموضوع
وداعا نور نت نورتنا
انت الخسران مش حد تانى

[Pepo]

طيب اظن ان الأخوة ماقصروش فى شئ.
وانا شاكر للجميع تعليقاتهم.
وقد قمت بتثبيت المشاركة مخصوص لأثبت لك اخ نور نت. انى لا اقوم بالإستهزاء بطلبات الأخرين ولا بأرائهم.

لكن

موضوع مثل موضوعك هذا. لو كان فى منتدى اخر كان مكانه اما الحذف او قسم لا يقرأ مواضيعه غير الإداريين..

لأنه واضح بكل مافيه انه إتهام وإستفزاز وليس نقد بناء بأى شكل من الإشكال.

بالنسبة لموضوعك الذى حذفته دون الرجوع اليك قبل حذفه.. لقد وضحت لك السبب لكن اسمحوا لى ان اوضحه بشكل اكبر.

تخيلوا معى ان هناك طفل فى اول سنة دراسية يتعلم هجاب الف باء.. هل بعد اول سنة. يصلح ان يتم نقله للمرحلة الثانوية او دراسة الفيزياء؟
بكل مقاييس المنطق لا يمكن..

انت كذلك اخى الكريم. فقط استطعت ان تركب منتداك.. مزال امامك الكثير لتتعلمه قبل ان تفكر فى فكرة تحويل إستايل
فا تحويل الإستايل مثله تماما مثل إنشاء ستايل من الصفر.
كل الفرق. انك حين تنشئ ستايل جديد. انك تبدع فى الوانه واشكاله وخلفياته الخ, لكن فى التحويل انت بتقوم بتصميم شكل الإستايل الذى تحول منه. يعنى تقوم بإنشاء ستايل يطابقه.. يعنى تنشئ ستايل جديد..

كيف تطلب منى ان اعلمك CSS و XHTML و التعامل مع إدارة الإستايل بشكل كامل فى موضوع واحد؟

اقرب لك الصورة اكثر.. رغم كل مايراه الجميع فى من خبرة.. انا اأخذ ما يزيد عن 24 ساعة (يعنى اجمالى 24 ساعة)
كاملة لإنشئ ستايل او احول إستايل.. كيف تريد منى شرح هذا فى موضوعك الذى فتحته؟ وكيف تتوقع مصير موضوع مثل هذا؟

أعزرنى يا طيب. فأنا لست اجير عند سيادتك. او المنتدى كله لا يوجد به غيرك انتظره حينما يطلب طلب يحتاج ايام وايام لشرحه بشكل كامل لألبى لك طلبك..

وخير الكلام ماقل ودل يا طيب.. انت وجدت طريقك والشئ الذى تريده فابالتوفيق لك ولأعمالك على الأنترنت واتركنا لأعمالنا..

برجاء بقائك فى المنتدى متوقف على الا تشارك فى الأقسام الخاصة بـ mybb من الأن فصاعد فهذا اقل حقوقى عليك.

لأنك احببت ان تقول مالديك علنا. لو كان الكلام بينى وبينك ربما كان انتهى الأمر بعد ان اوضح لك الصورة.

وشئ اخير

لا يهمني رائي الاعضاء ولا رائي اي كان في المنتدى مايهمني هوه رائيي ووجهه نظري وهده هي وجه نظري وانت بالفعل لقد قمت باغلاق مشاركه لي علما بانها مشاركه لاتسيئ لاحد ولا لشيئ بل هي مشاركه تفيد الجميع المبتدى والمبدع وشكرا

لا يهمني مادا يقول الاعضاء شكرا لك اخ بيبو على التتبيت وهدا شرف لي

لو كان كلامك هذا مظبوط اذا لماذا تفتح موضوع فى المنتدى وتطلب عدم حذفه او غلقه؟
كل الموضوع انك تريد إثارة بلبلة فى المنتدى.. وهذا نتيجة محاولتنا لمساعدتك..

يكفى هذا القدر والموضوع مغلق ولا مزيد من التعليقات.. ولا تنسى تنبيهى لك.